Сайт ашылғанда алғаш келген ой
10.01.2016 | 654 рет оқылған | Пікірлер: 0
Міне, асқар бел, сайын даламызға мамықтай ұлпа қар түсті. Ақ сақалды атаның батасы дарыған, ақ жаулықты ананың мейірі төгілген, қойнауы жасыл желек жамылған, көгілдір түспен көмкерілген, заңғар Алатау жиектерінен төгілген күн нұры алдағы жақсылық хабаршысын жеткізгендей. Осы қуаныш – адамды арманға жетелейді. Жаңа жыл қарсаңында менің есімімдегі сайт ашылып, бұл да бір жақсылықтың нышаны болса игі деген тебіреніспен ой жетегіне түстім.
Ерлан Төлеутайға ризамын
10.01.2016 | 516 рет оқылған | Пікірлер: 0
Ақпараттар ағынында ұлттық музыкамыздың кіршіксіз тазалығы мен мөлдірлігін сақтау жөнінде ойларын ортаға салып, өте батыл айтып жүрген Ерлан Төлеутайға ризамын. Бүгіндері Ерлан «Қазақ елі» көркем фильмін түсіру барысында ат салысып жүр.
Әміре әндері Қайым Мұхамедхановтың шаңырағында шырқалған еді
08.01.2016 | 629 рет оқылған | Пікірлер: 0
ӘМІРЕ ӘНДЕРІ ҚАЙЫМ МҰХАМЕДХАНОВТЫҢ ШАҢЫРАҒЫНДА ШЫРҚАЛҒАН ЕДІ
Әміре атамыздың орындауындағы фонограф таспасына жазылған әндерді Мәскеуден тауып Алматыға әкелгенім сол еді, сол күні Партияның Орталық комитетінде, Қазақстан Компартиясы Орталық комитетінің мәдениет бөлімінің меңгерушісі Михаил Иванұлы Есенәлиев қабылдады. Есенәлиевтің қабылдауынан соң бүкіл қала жұртшылығы Әміре дауысы табылыпты, десіп мені жоғары көтерді. Газеттен газетке, журналдан журналға небір хабарлар жазылып жатты. Әуелі Сұлтан Оразалин Қазақ теледидарынан жария етті. Қалалық Халық университетінде Рахманқұл Бердібаев ағамыз Сапарғали Бегалин, Серәлі Қожамқұлов, Жүсіпбек Елебеков, Әлкей Марғұлан, Әшімбек Бектасов, Сапабек Әсіпов, Қабдікәрім Ыдырысов, Болат Сарыбаев т.б. бастағын жұртшылықтың басын қосып, сүйіншілеп жиын өткізді. Сол сәтте Рымғали Нұрғалиев: «Әміре атаңның Парижге аттанған жері Семей ғой, сондықтан енді кезек күттірмей Семейге апарып Қайым Мұхамедхановтың алдынан өтіп, батасын ал» деді. Содан соң Әміре жайлы зерттеуіңе жол ашылады, деді.
Әміре жайлы фильм түсіріледі
04.01.2016 | 572 рет оқылған | Пікірлер: 0
Жыл басындағы айта қаларлықтай жаңалықтардың бірі Әміре атамыз жайлы көркем фильм түсіріледі деген хабарды естігеніміз болды. Фильм ағылшын тілінде түсіріледі, деп жазылды ақпараттар ағынында. Әміре шын мәнінде Қазақ деген халықтың асқақ әнін әлем жұртшылығына алғаш танытқан адам. Құлақ құрышын қандырар теңдессіз мөлдір, әдемі дауысы әлем аспанында қалықтады. Таңдай қақтырды. Осылай бола тұра әншінің 46 жылдық ғұмырының соңғы кезеңі жеке басының тасқа соғылғанындай трагедиясына айналды. Әміре жазықсыз еді. Енді міне жазықсыз адамның ғибратты істері Алланың құлағына шалынып ол туралы ұрпақтары игі жақсылықтар атқара бастады. Семейде Әміре Қашаубайұлына ескерткіш қойылды. Өз басым Әміре атамыз жайлы жазған 5 кітаптың авторы ретінде ағылшын тілінде түсірілмек кинофильмнің, түсірушілер тобына іске сәттілік тілеймін!
Қадірлі ғаламтор оқырмандары, «Zharkyn Shakarim | Жарқын Шәкәрім» сайтының көрермендері!
Алла берген уақыт еншісінде туған жеріме, туған еліме, қазақ аспанына сүйсініп өстім. Қазақ деген ұлы халықтың ұлы болып жаратылғаныма, Ұлы дала елі қасиетін бойыма дарытқаныма өзімді шексіз бақытты санаймын. Көзіміз көріп отырған өркениет өрісіндегі ғаламтор деген өрмекшінің торындай, осы бір адам түсініп болмайтын дүниенің маңыздылығын сезіне отырып, атадан дарыған ғұмырымның келбетін, көргендерім мен түйгендерімді, білгендерімді осы ғаламтордағы өзімнің атымдағы жеке сайт арқылы өздеріңіздің алдыңызға ақ ниетпен жайып отырмын. «Өмір өтер, керуен кетер» деген ата салтындағы уәж әрқашан ойымда жүреді. Сондықтан аға буан ұрпақтың өтіп бара жатқан легі, ұзаған сайын Абай атамыз: «Ақырын, ақырын шегініп, алыстап кетті ау құрғырлар» дегендегісіндей көмескіленіп көрінбей бара жатқаны шығар күндей шындық. «Ой түбінде жатқан сөз шер толқытса шығады. Су түбінде жатқан тас, жел толқытса шығады» деген толғаныс, тебіреністер болмай тұрмайды. Қазақ жұртының алыптары Әлкей Марғұлан, Серәлі Қожамқұлов, Сара Есова, Жүсіпбек Елебеков, Сапарғали Бегалин, Рахманқұл Бердібаев, Рымғали Нұрғалиевтер менің жігіт кезімде ақ баталарын берді. Ақ тілеу баталар мені әлі күнге алға жетелеу үстінде келеді. Баталы қарттардың ақ пейілдерімен нарық деген мына заманға да жетіп аяңдап келемін. Қазақ Елі деген Ұлы Отаныма мысқалдай да болса үлес қоса алсам, із қалдыра алсам, менің айтқан сөздерім келер ұрпаққа мысқалдай да болса жетсе, бұл өмірдегі ұстанған принциптерімнің орындалғаны деп санаймын.
Менің сайтым – менің кітабым. Осы жазғандарым сөз жоқ баспадан кітап болып жарық көрмек.
Құрметті оқырмандар!
«Zharkyn Shakarim | Жарқын Шәкәрім» – сайтынан көріп оқитындарыңыз менің өмір жайлауымдағы, жеке шығармашылық бел-белестерімнің бір ғана шеті болмақ. Жастайымнан жазғандарым, ұшталған ойларым, ұшан теңіз. Сондықтан да талай-талай ізгі дүниелерімді аманшылық болса алдағы уақытта менің есімімдегі осы жеке сайт арқылы бір-бірлеп оқитын боласыздыр. Өздеріңізге бек сенімдімін әрі тілектеспін!
01.01.2016
Құрметті көрермендер және оқырмандар!
Менің төмендегі өтінішімді қабыл алыңыздар!
Оның мәні: Менің сайтымдағы материалдарға үн қатар болсаңыз, парасатты әрі таразыланған пікір қалдыруға шақырамын.
Ненормативті лексикадан және жеке басқа қатысты, діни, ұлттық, саяси, жарнама және басқа да сипаттағы кемсітулерден аулақ болсаңыз екен деймін.
Заңға қайшы пікір қалдырудағы жеке жауапкершілігіңізді естен шығармаңыз.
Менің, өз басым өшпенділікке, ұлтаралық алауыздық пен экстремизмді үндеуге қарсымын. Сол себепті мұндай жағдайда пікірді себебін түсіндірмей-ақ өшіруге және материалдарға пікір қалдыру мүмкіндігін кез келген сәтте тоқтатуға құқылымын.
Ізгі ниетпен Жарқын Шәкәрім.
